政壇：「峯鴿」聯署批黃成智違黨紀
泛民主派嘅立法會議員堅拒就政改方案「袋住先」，而白鴿黨中委、立法會前議員黃成智早前撰文呼籲泛民有條件下政改「袋住先」，隨即觸發白鴿黨再次內訌，該黨中常委有「峯鴿」之稱嘅許智峯計劃按黨內會員行為守則同紀律程序，向黨內紀律委員會投訴黃成智嘅政改言論，違反黨中委會就反對人大常委會「八三一」框架，同埋否決「八三一」框架下嘅政改方案決議案。
許智峯（圖）向民主黨內紀委會投訴黃成智「袋住先」言論違反黨紀。（資料圖片）
黃成智（資料圖片）
據悉，白鴿黨將於明晚舉行中委會，預料會討論黃成智被指違反黨紀事件。
「峯鴿」話至今已收集約十名黨友聯署，包括區議員陳樹英、黃偉賢等，又稱黨內絕對可以有唔同意見，但必須尊重黨內民主決策機制，批評黃成智繞過黨內民主機制嘅公開言論，令該黨喺政改問題上立場變得模糊，受公眾批評，對黨唔公道。黃成智以未收到正式投訴通知為由，暫不回應，其後接受其他傳媒查詢時重申唔會收回支持政改「袋住先」嘅言論。
曾提倡「袋住先」嘅白鴿前副主席狄志遠隔空批評現時白鴿黨不容許不同意見，不同意見就被批評為不遵守黨機制、令黨立場模糊，「總是怕激進人士壓力，亦唔理會兄弟情，只要係不同聲音，就會受到批鬥」。佢強調「作為一個大黨，不應表現如此虛弱」，只要立場堅定立論有理，而且有民意基礎，唔需要害怕有不同聲音。
