政壇：黎棟國手帶電震驅睡魔
黎棟國早前被發現喺立法會會議期間「瞌着覺」，當局事後解釋話局長係感冒不適食咗藥，而局長亦承認去立法會前幾日啱啱去完日本旅行，旅程中感冒，回港後服食咗成藥，萬料不到會咁眼瞓。不過，相信呢個「瞌着覺」畫面應該唔會再出現嘞，點解？局長笑笑口揮一揮右手話，因為有人會「電」醒佢喎。
黎棟國今後有運動手帶震動防瞌眼瞓。（資料圖片）
呢個畫面相信唔會再出現嘞！（資料圖片）
運動手帶（資料圖片）
望一望局長嘅右手，原來戴上咗一條運動手帶，佢話手帶嘅其中一個功能，就係可以經藍芽接駁智能手機，每當手機有來電就會震動，笑言以後一旦喺立法會會議上「企圖」合埋眼，佢嘅新聞秘書就會打電話「震」醒佢咁話。
黎棟國話呢條運動手帶係佢一個後輩幫佢喺網上購物買番嚟，百幾蚊就到手，價廉物美，配合埋手機App，可以計埋每日步行步數、睡眠質素，計算每日有幾多個鐘深睡，幫佢監察埋健康。佢又話每日都要瞓八個鐘頭，仲講笑話自己其中一個「優勢」，就係一上床就幾乎可以即刻瞓着，瞓醒覺就可以精神奕奕，面對每日忙碌嘅工作。
