趕客之都惡名揚 經濟寒冬無盡頭
香港話就話係購物天堂、好客之都，其實浪得虛名嘅咋。大家有眼見，驅蝗、光復鬧劇不斷，加上租金高企，營運成本急增，香港早就同價廉物美好客絕緣，旅客識得揀，梗係唔揀香港啦。「東方報業民意調查」顯示，絕大部分受訪者擔心旅遊業不景氣拖累經濟，香港遲早玩完。
冇誇張o架，入境處數字顯示，上月訪港旅客按年下跌百分之八點七，當中以內地旅客跌幅最勁，差不多達一成。旅遊業議會最新數據亦指出，三月內地訪港團每日只有約三百團，較去年同期大減，而東南亞旅客更下跌兩成，連帶酒店入住率也應聲下跌百分之五。有酒店要大減價搶客，都係迫於無奈嘅咋。
一榮俱榮，一損俱損。訪港旅客大減，受影響嘅點止旅遊業咁簡單，零售業步入寒冬先至最大鑊。呢，今年首兩個月零售業總銷貨價值合共下跌百分之二，其中珠寶首飾等奢侈品嘅銷貨價值暴跌近一成六，問你怕未。零售管理協會仲話，對於今個復活節嘅市道持續悲觀，唔排除有店舖結業喎。話時話，多個旺區最近都出現大量吉舖，反映零售業情況嚴峻。「東方報業民意調查」顯示，三成四受訪者擔心前景不明朗，影響本港經濟；兩成九憂慮零售業由盛轉衰，步入寒冬；兩成五直指整體消費氣氛疲弱。
搞成咁，四成一受訪者認為反水客示威嚇怕旅客；兩成六歸咎於旅客消費模式改變；兩成二直斥本港缺乏新景點。咁又係呀，有錢任性吖嘛，世界上好食好玩又好客嘅地方大把，香港冇乜景點又趕客，內地客何苦來呢度花錢買氣受？所以咯喎，南韓、日本等地近來成為內地客嘅至愛，澳門上月亦錄得內地旅客逾一成嘅按年增幅，收人仔收到手軟，真係要多謝香港趕客咯。
趕客嘅唔止激進分子，仲有百物騰貴。由於其他地區貨幣貶值，同樣貨品香港貴人一截，邊個願意做冤大頭喎。咁就難怪三成八受訪者直指香港失去購物天堂美譽；兩成九批評香港物價高，削弱競爭力；兩成四認為旅客紛紛轉戰外國。
一日最衰都係港府，個人遊推出十幾年，當局淨係識得食老本，旅遊景點從來未見增加，搞到旅客人滿為患，大好商機都變成社會危機，令別有用心者有機可乘。所以話啫，官僚廢柴，政客倒米，香港想唔沉淪都幾難。叮！
