城中鏡：王敏剛 黃保欣敍舊唔提亞視
特首梁振英前晚喺禮賓府宴請《基本法》起草委員同諮詢委員約四十人，齊齊慶祝《基本法》頒布二十五周年，前基本法委員會副主任黃保欣同基本法諮委會成員王敏剛亦有出席。王敏剛話其實之前都約咗保欣叔食飯，但因為佢老人家身體唔舒服最後冇出嚟，當晚難得見面，梗係要第一時間噓寒問暖同影張開心合照啦！
王敏剛（右）話冇同保欣叔（左）傾過亞視不獲續牌嘅事。（互聯網圖片）
當晚佢哋嘅話題，主要都係回顧同圍繞過往廣大市民對《基本法》唔熟悉同唔明白嘅地方。講起保欣叔曾經做過亞洲電視主席，唔知佢哋有冇談及亞視不獲續牌單嘢呢？王敏剛就話冇，但就有提及亞視，佢個人就覺得行政會議今次決定可能考慮得唔夠周全，事關嚟緊一年如果預咗蝕錢，咁亞視員工都唔知繼續做好定唔做好，又唔知應唔應該遣散等，衍生好多問題。佢認為應該畀一個最後嘅死線亞視去處理，例如六個月期限咁，等大家可以有啲走盞位，考慮其影響有幾深遠後先再決定，但點都好啦，既然決定咗，都會尊重行會決定嘅。
