城中鏡：鄭明明嘆港美容業限制多
立法會議員Ann蔣麗芸日前喺社交網絡嘅個人會客室訪問「美容教主」蒙妮坦集團董事長鄭明明，交流美容業界問題，又話第一次遇到明明姐個大女時，覺得對方靚到驚為天人喎。
蔣麗芸（左）日前訪問「美容教主」鄭明明，交流美容業界問題。（互聯網圖片）
蔣麗芸覺得鄭明明大女陳維蕊（左）同細女陳維黛（右）輪廓都好靚。
講到美容，阿Ann最好奇係點解七、八十年代時，好多東南亞、台灣等地嘅人嚟香港學藝，當時香港嘅美容業相當蓬勃，但時至今日，技術就畀其他鄰近地區超越咗。明明姐坦言，當年每個月要出席三、四間美容院開幕，而佢最叻嘅學生係嚟自新加坡同台灣。不過，佢認為喺香港經營美容業限制較多，例如好多儀器美容師不能操作，而部分客人亦傾向喜歡投訴，令從業員戰戰兢兢，唔能夠放膽去做。
鄰近地區迎頭趕上
至於南韓等地嘅美容業則不斷進步，化妝同護膚等產品服務更係一條龍，明明姐期望香港都可以生產屬於本地嘅化妝品牌。
除咗業界問題外，阿Ann對明明姐嘅持家之道亦甚感興趣，好似佢點同老公相處等，阿Ann仲大爆第一次喺機場見到明明姐個大女時，佢就覺得對方皮膚同輪廓都好靚，而佢細女都一樣擁有標致臉孔。
