今年復活節連埋星期六、日，變相多兩日假期，所以好多港人都趁機出外旅遊，唔少立法會議員都係咁而出外旅遊。不過，世界真細小，議員劉慧卿同Cyd何秀蘭結伴遊日本京都，估唔到同鍾樹根狹路相逢，唔知佢哋有無約埋喺櫻花樹下辯論政改呢？

鍾樹根去日本嵐山賞櫻花，點知遇到劉慧卿、何秀蘭。（受訪者提供圖片）

尋日打畀仍然身在京都嘅樹根，佢話的確係撞到卿姐同阿Cyd。難得唔同黨派聚首一堂，本來係大好機會喺櫻花下風花雪月一番，但樹根話三人只係打個招呼就要拜拜，想講多幾句都唔得。唔通佢哋平時政見不同，出到外地都面左左？樹根話當然唔係啦，因為大家都趕時間搭火車去嵐山賞櫻，所以講咗幾句就算。

樹根話今年日圓低水，所以去日本豪一豪，佢仲話今次要「為國爭光」，至於去京都做乜嘢為國爭光，佢就無講咁多，只係笑咗兩聲，真係令人有唔少聯想囉！唔通喜愛攝影嘅樹根，參加咗櫻花攝影比賽？

第一手消息請下載on.cc東網iPhone/iPad/Android/Windows Phone Apps