政壇：張文光被轟教協建制派
教協監事會每兩年都會改選，一年前嘅改選突然爆出內訌，由「進步教師同盟」（進師盟）嘅韓連山領軍對撼元老級張文光團隊，最後張文光團隊大獲全勝，進師盟喺十九席中只係獲得六席。韓連山尋日就喺社交網站大呻，過去一年，進師盟六個成員喺監事會提出嘅所有建議都被否決或拖延，質疑教協被張文光等人壟斷，更自稱為監事會內嘅泛民，要對抗張文光嘅建制議會暴力。
韓連山自稱為教協監事會內嘅泛民，要對抗張文光嘅建制議會暴力。（資料圖片）
韓連山（資料圖片）
一向主張理性民主嘅張文光喺較早前已經承認同激進民主嘅韓連山不同路，韓連山尋日喺網上炮轟張文光係「民建聯」、「建制派」。韓連山話，呢一年喺監事會嘅工作舉步維艱，監事會不論主席、副主席、秘書同所有監察小組召集人都係建制派，而佢就係議會嘅泛民，所有建議都被否決。佢又批評張文光等人行使嘅議會暴力，比立法會內嘅建制派更猖獗、更純熟。我哋曾嘗試聯絡張文光，但未有回覆。
