政壇：鬍鬚曾蚊髀同牛髀
財爺「鬍鬚曾」曾俊華一向鍾意透過網誌推銷政策同個人理念，尋日佢又借網誌講到美國聯儲局前主席伯南克，上星期分別喺Brookings Institution嘅網頁同Twitter開咗帳戶，話伯南克同佢一樣都變咗「鍵盤戰士」。鬍鬚曾竟然諗到用呢個方法同伯南克拉關係，認真厲害。不過，伯南克之前掌管嘅聯儲局影響全球經濟變化，而鬍鬚曾只係港府財政嘅「大掌櫃」，咁比較唔知算唔算係「蚊髀同牛髀」呢？
設計圖片及對白
硬銷「一帶一路」
鬍鬚曾名副其實係「鍵盤戰士」，佢自從開咗facebook（fb）帳戶，幾乎每個星期都變身鍵盤戰士寫網誌，經常更新狀態，講吓佢嘅愛好、不厭其煩咁推銷政策、駁斥外間對佢嘅誤解，有時甚至仲會月旦政事，兼且會上載相片同影片咁。雖然多咗同市民交流係好事，但佢始終身居要職，用咁多時間經營fb怕唔怕浪費時間，荒廢政事？而且伯南克係辭任聯儲局，先加入網絡世界做「鍵盤戰士」喎。
不過，鬍鬚曾似乎唔覺得沉迷網絡世界係一個問題，而且好想用fb同青年人打成一片。自從佢發表咗新一份預算案，當中提及「一帶一路」後，呢排係咁喺網誌硬銷，尋日佢喺網誌上又重提，講到喺座談會上兩次見到一個十分支持把握「一帶一路」發展機遇嘅港大女同學Mathilda，仲話Mathilda呢個名算冷門，唔知靈感係唔係來自《這個殺手不太冷》（Leon）裏面Natalie Portman嘅角色，叫人哋喺fb同佢講。
佢喺網誌上又講到有小部分人唔重視、甚至反對經濟發展，但其實佢哋一直享受緊經濟發展嘅成果。佢又話「心中富有」唔等於忽視經濟發展，兩者之間其實有好大嘅兼容空間，好多重視「心中富有」嘅香港人，同時重視發展經濟、創造財富，希望用財富去解決唔同嘅社會問題，改善生活。
