疑慮未清惹爭議 誰為三跑定錯對
除咗政改爭拗之外，如果要揀今年本港最惹火嘅「尤物」，相信莫過於興建機場第三條跑道，自從行政會議拍板之後，爭議聲音不絕於耳，有人支持，有人反對，公說公有理，婆說婆有理，都唔知究竟聽邊個好。
呢，近日又有團體發起「反三跑」簽名行動，話要收集市民意見，向當局反映，建議將有關資金投到其他民生項目喎。即係咁，香港係多元社會，凡事都有正反兩方面意見，有人反對興建三跑唔出奇，關鍵在於當局必須提高透明度，向市民交代清楚，釋除所有疑慮，咁先至可以爭取更多民意支持，如果唔係，一味遮遮掩掩，講啲唔講啲，盞引起更多質疑，弄巧反拙，隨時可能變政治炸彈。
係人都知，香港作為一個國際都市，如果唔興建第三條跑道，唔止可能影響競爭力，隨時連航空樞紐地位都不保，尤其係周邊城市已經分別擁有第三甚至第四條跑道，香港已經落後於人，再唔急起直追，被邊緣化一啲都唔出奇。之不過咁，任何基建都要考慮成本效益，以確保物有所值，尤其係三跑涉及巨額資金，更加唔可以求求其其。
話時話，興建一條跑道居然要一千四百幾億元，相比起深圳一條機場跑道加候機大樓僅花二百幾億元，廣州一百億元建一條新跑道，香港三跑幾乎貴絕全球，實在好難唔令人質疑。再講吖，香港大型基建例牌延誤兼超支，三跑會唔會例外呢？萬一有乜阻滯，一千四百幾億元隨時唔夠埋單，到時又搵邊個填氹呢？
仲有吖，當局為咗避開立法會，採取所謂自行融資方案，話就話唔使花費公帑，其實羊毛出在羊身上，當局計劃向每名旅客徵收一百八十元機場建設費，咪又係向市民開刀。至於珠三角空域限制等問題，亦有唔少疑慮未澄清，有人擔心三跑將來投入使用後，因為空域限制而未能物盡其用，隨時淪為大白象工程，絕對唔係杞人憂天。
總而言之，作為本港有史以來耗資最多嘅單一基建項目，興建三跑涉及巨額公帑，絕對唔係小事，必須周詳考慮，慎之又慎。尤其係對於市民提出嘅各種疑問，當局更加要開誠布公，詳細交代，否則想爭取民意支持都幾難。最怕繼續爭拗落去，隨時夜長夢多，好事變壞事，咁就唔衰攞嚟衰咯，叮！
