SUN搞作：網絡小說：「世紀大騙案」
「歡迎大家收睇《竟信》，我係你哋嘅節目主持人……龍虧！」龍虧未站穩便續道︰「近日有唔少市民致電投訴自己慘成水魚，究竟邊個咁無良，專呃啲日日OT，但人工永遠追唔上樓價嘅市民呢？我即刻為大家追擊一下。」
「近來有人出招令市民糊塗，途人以為有着數而『葡萄』，又齊齊糊塗，最後劫數難逃。」龍虧指向身後樓宇，「佢哋覷準市民上樓心切，以低於市價嘅廉價樓作招徠，購買資格用抽獎決定，人人想博一博，一犬吠影，百犬吠聲，引發萬人排隊交表。」
龍虧愈講愈激動，「攪珠結果，萬眾期待，你以為中頭籌，但世上邊有免費午餐？原來隊分兩條，有綠白之分，白表單身日夜祈禱，換嚟係下次請早。」
「其他綠白家庭以為成功？你老X，呢度係香港，成功要靠父幹！屋企無長者，原來又係無……」
龍虧長嘆一聲，「唉，申請費事小，上樓無期事大，我喺度呼籲如果大家見到上述無良人士，唔使同我哋聯絡，直接鬧佢無能，大肆發洩喇！」
