政壇：葉振南返汕頭必狂掃牛丸
香港汕頭商會早前舉行六十九周年暨會董就職典禮，從事啤酒代理嘅葉振南（Stephen）接棒做新會長，大家傾起潮汕多美食，Stephen就相當興奮話每次返汕頭都會搬一磅磅牛丸返港，得閒就喺屋企煮麵食，不知幾滋味。
葉振南（右）做會長，身旁的稀客張雲正都捧場。
張俊勇（左）偕太太陳慧苓（中）及父親張成雄現身同樂。
同樣係「家己冷」嘅潮州商會會長張成雄同兒子張俊勇夫婦出席，觀瀾湖集團主席兼行政總裁朱鼎健亦有到場。仲有稀客海關關長張雲正，佢啱啱去日本大阪旅行返嚟，回程時喺當地機場見到唔少港人帶一箱二箱零食返港，笑稱呢個場景令佢諗起一班內地水貨客喎！不過佢對食物冇乜興趣，反而鍾情行街買衫，盛讚日本西裝、皮鞋同眼鏡款式又多又靚，仲好耐用，fit晒亞洲人嘅身形同輪廓咁話。
長實執行董事趙國雄都有到場，問佢擔唔擔心前排嘅反水貨客示威影響旗下商場生意，佢話只要商場通道夠闊落，相信都唔會造成危險。至於深圳前海打算設立港貨中心，佢坦言有興趣，不過需要了解多啲細節先可以決定點做。
