政壇：乒乓孖寶爆華選手愛血拼
有「乒乓孖寶」之稱嘅前香港奧運代表李靜同高禮澤，尋日現身「《基本法》頒布二十五周年研討會」，分享同內地運動員上場競賽、落場交流嘅經驗，李靜期間爆料話，內地選手都鍾意嚟香港「血拼」購物。佢有香港嘅買嘢經驗，而內地選手就喺打波上有優勢，大家彼此交流，都係另一種雙贏喎。啊？用「血拼經」換「波經」，究竟邊個着數啲？
「乒乓孖寶」分享同內地選手交流嘅經驗，李靜（左）爆內地運動員鍾意來港購物。右為高禮澤。
除咗「乒乓孖寶」外，商務及經濟發展局前局長馬時亨（肥亨）同前特首辦主任、港大醫學院院長梁卓偉都參與對談。肥亨被問到喺香港從事金融業嘅前景時，話仲係前途無可限量，不過佢就告誡年輕人，咪以為住喺香港好威，其實內地學生同「海歸派」中英文都好好，香港年輕人一定要喺語文能力加把勁，同埋要有國際視野至得。
梁卓偉就話喺「一國兩制」下，香港作為開放型社會，對全球醫療科技及資訊接收得好快，除咗可以造福病人，亦可以帶動創新科技新經濟體，講講吓，仲話希望創新及科技局成立後，可以令生化醫學發展更旺盛。咁都畀佢兜到圈硬銷創科局，睇嚟商經局局長蘇錦樑都要跟佢學吓嘢先得喇！
