政壇：戴錯帽警花調P記上位
佔領行動雖令警隊疲於奔命，但亦帶挈唔少警隊中人上位，好似佔領期間每日下午四點鐘見傳媒嘅警察公共關係科（P記）總警司許鎮德就一夜爆紅。曾戴錯皇冠警徽帽嘅靚女高級警司關翠貞亦因禍得福，聽聞因佢當日識「執生」，即刻換番洋紫荊警徽帽重返現場，輕易化解危機，獲警隊高層賞識，今個月二十號就會過P記任高級警司，做許Sir嘅得力助手。
關翠貞因戴錯帽識執生，成功上位。（資料圖片）
關翠貞係警隊公認嘅警花，睇番佢年輕時嘅相片，確有幾分姿色。
關翠貞當日被傳媒發現戴錯帽後，即刻穿戴正確重返現場，先讚傳媒好眼力，又認係佢個人疏忽，再加個甜美笑容，輕易化解危機。佢對答大方得體深得高層賞識，認為係公關之材，可幫手拆彈，所以調派佢到P記。唔講唔知，許Sir同關翠貞仲係中學師兄妹添！關翠貞係警隊公認嘅警花，睇番佢年輕時嘅相片，確有幾分姿色。佢同任職警界嘅丈夫育有兩子一女，先後駐守多個部門。至於現任P記高級警司江敏強，將調任商業罪案調查科。
