政壇：護反水貨暴民歪理泰過分
新界多個市鎮早前發生反水貨客示威，參加者粗口指罵、暴力踢趕內地消費者，行動愈演愈烈，連本地居民都中招。事件大損本港形象，被指係反水貨客行動核心組織成員嘅理大導師鄭松泰卻懶理民間反應，話行動雖然冇實際成果，但有一定效果喎，講到示威者喺屯門暴力推跌一名本地長者時，鄭松泰先將責任推卸畀傳媒，話傳媒混淆咗激進同暴力，跟住又話係老伯拎住支棍襲擊示威者先，而當時嘅場景細節係唔會有真相，因為聲音同片段都經過剪輯喎，真係歪理連篇，唔知有冇人聽到火起三丈呢？
承認對遊客留壞印象
連串暴力衝擊後，身兼熱血公民成員嘅鄭松泰都畀唔少團體指摘佢教壞人，尋日佢出席一個電台節目時大講歪理，弊在愈辯愈亂。佢話，示威者冇公權係弱者，亦係一簽多行政策下嘅受害者。而喺呢啲官逼民反嘅示威中，過程難免有小瑕疵同小問題，唔應該無限放大。
跟住佢仲搬埋秦末嘅陳勝、吳廣起義嚟講，反問係咪應該由示威者向政權道歉？咁呢啲反水貨客示威係咪影響到香港嘅形象呢？鄭松泰就倒打一耙，話影響香港形象嘅係水貨客，反水貨客示威係撥亂反正。轉個頭，佢又死死氣承認，行動的確會令遊客有一個唔好嘅印象，就係香港人鍾意周街搞人。
近日大家關注邊境興建購物城，鄭松泰話，興建邊境購物城係違反經濟邏輯嘅建議，因為如果集中一個地方賣奶粉，價格變化將會好難預測，可以變高或變低。呢個時候，連主持人都忍唔住駁斥鄭嘅言論，笑言話做生意嘅人唔會特登提高價格趕客。
至於熱血公民嘅底線，鄭松泰強調成員唔會主動襲擊或侵害他人身體，但如果畀人打，就要擋同自衞，否則就違反常理。其實每次示威活動都難免有肢體碰撞，按照鄭松泰嘅講法，即係每次示威都有可能演變成衝突，甚至係打大交？
