只見處處屏風樓 最怕有氣冇碇抖

呢，有港大學者引述天文台數據指出，本港城市地面風速由一九六八年嘅每秒三點五米，減至舊年嘅每秒兩米，而過去一百年城市嘅平均氣溫亦上升咗兩度。根據學者分析，香港之所以愈來愈翳焗，皆因高樓大廈星羅棋布，唔止愈起愈高，仲愈起愈密，形成屏風效應。以中環為例，六成地方有建築物，大廈平均高度達一百米，而港島由北角至中西區嘅高樓大廈更加形成一條腰帶狀，令山風難以通過。

咁都唔止吖，大廈密集加上巨型廣告牌擋風，令熱力向內走，再向上升，形成「穹頂狀」，熱流包圍城市，污染物被焗住，估計香港每年有百分之一嘅日子，就係因為咁樣而令空氣變差。

其實，屏風效應唔係一朝一夕嘅事咯。近年大角咀以及西九沿海一帶高樓大廈愈起愈多，形成一個個屏風，導致空氣唔流通，觸發附近街坊強烈反彈，又抗議，又打官司，搞到家嘈屋閉。

即係咁，屏風效應之所以愈來愈嚴重，固然因為香港地少人多，惟有向高空發展，但更重要嘅係當局規劃混亂，加上覓地建屋處處受阻，令問題更加惡化。好簡單，要增加住宅單位，一係大量增加土地供應，二係增加樓宇高度及密度。可惜吖，增加土地供應此路不通，發展新界東北固然寸步難行，填海造地更加諗都唔使諗，咁搞法，樓宇有乜法子唔愈來愈高、愈來愈密吖？正所謂，針無兩頭利，又要有屋住，又要有靚景，又要空氣清新，香港邊有咁着數嘅事o架？

所以話，想解決屏風樓問題，港府固然要做好規劃，市民亦要作出抉擇。係人都知，香港唔係冇地，問題係社會泛政治化，內鬥內耗搞到乜都做唔成。睇吓新加坡，地方仲細過香港，但填海面積已經達城市總面積兩成，已發展土地佔總面積達四成，反觀香港填海面積及已發展土地分別只佔總面積百分之六及百分之二十五咋。唔怕唔識貨，最怕貨比貨，香港同新加坡根本冇得比。

總而言之，一個住屋問題，一個空氣問題，搞到香港烏煙瘴氣，愈來愈不宜居，再唔諗辦法解決，香港遲早淪為第三世界咋，叮！