日圓係咁跌，做日貨生意理應好和味，但進口唔少日本和牛嘅叙福樓集團執董Simon黃傑龍就話無着數。事關日本和牛係食美國飼料，隨着日圓弱勢，飼料變相加價，埋單計數只係打個和。

黃傑龍

Simon話舊年加州大旱，農作物失收，令全球飼料價格上升，預計今年牛肉價格將漲價一成，所以佢趁早買定期貨牛肉，抵銷番加價壓力。

雖然入口和牛無着數，但買入日本威士忌，就平到你唔信。Simon話有次佢喺日本買一支價值七百港元嘅限量版威士忌，回港見到有店家標價過萬元，於是佢又掃入幾支絕版酒廠釀製嘅威士忌，同系酒喺拍賣市場售數十萬元一支，但係佢以幾舊水就買到，認真抵。

第一手消息請下載on.cc東網iPhone/iPad/Android/Windows Phone Apps