城中鏡：IT精英籲港人勿短視

香港資訊科技及通訊界日前舉行聯合春茗，業界精英群集。好耐冇見嘅立法會資訊科技界前議員譚偉豪同楊偉雄亦有出席，眾人一見到楊偉雄，都爭相上前打招呼。

香港資訊科技聯會會長Duncan邱達根講起創科局開局一波三折，十分心翳。佢話開局非為業界攞着數，而係追隨世界大趨勢。佢話新加坡已發力跟上，由副總理親自跟進創業政策，積極引入專業投資者，反觀香港，想搵政府高級官員或專責部門傾吓都唔使諗。

故步自封 如在夢中

Duncan話曾試過同內地官員商討科技合作，對方聽完覺得大有可為，但礙於官階唔對等，亦愛莫能助。互聯網專業協會會長洪為民同副會長馮德聰都有出席，洪為民對本港科技發展停滯不前亦感到無奈。

雲端與流動運算專業人士協會會長陳家豪就提醒港人不要故步自封，佢話依家內地用一部手機就搞掂晒訂機票、酒店、餐廳、送禮物、畀的士錢，全部喺幾分鐘內完成。佢形容港人生活如在夢中，若不急起直追，恐淹沒喺科技大勢嘅洪流中。