環境局局長星星黃錦星喺膠袋徵費第二階段實施之前，實牙實齒話做足宣傳，又話會有人放蛇，但係前日實施嗰陣亂象頻生，唔少商戶仍唔多熟悉需徵費嘅貨品分類，即使係獲豁免嘅冷藏飲品，有便利店亦要求收膠袋費，又有店舖為免誤觸地雷違例受罰，凡顧客索取膠袋都一律收費，仲有商戶各自演繹收費，訊息混亂。膠袋徵費原意係推動環保意識，依家變成商戶亂畀膠袋，兼有斂財之嫌，唉，真係唔亂都畀星星搞到亂，呢鑊唔鬧爆你都唔得。
