政壇：每周之星：至叻星：醫局山頭主義 高永文有排拆

醫院管理局被批「山頭主義」同資源分配不均，身兼該局督導委員會主席嘅食物及衞生局局長高永文日前話，委員會建議醫管局制訂新嘅方程式，按各聯網人口結構同服務需求分配資源。另外醫管局總部應發揮更積極角色，當個別聯網有緊急服務需求時，可有力從其他聯網調撥資源及人手。據了解，醫管局內部已制訂初步改革方案，就山頭主義問題將引入「輪換制度」，以免部分醫院管理層長年喺同一聯網任職。呢個醫管局陋弊，唔係一時三刻拆得掂，高永文唔好得把口齋噏就算呀，唔係最後都係市民受害！