政壇：唐英年帶頭整合江蘇幫

呢兩年係選舉年，年底舉行區議會選舉，明年就係立法會選舉，而香港左派社團圈子又開始有動作。繼廣東、福建、上海、浙江及重慶等地各自成立社團總會之後，最近有人發起成立香港江蘇社團總會，希望將無錫、南京、常州等江蘇地區社團勢力化零為整。

祖籍無錫嘅全國政協常委「唐唐」唐英年有份帶頭整合，佢話江蘇近年經濟起飛，舊年境內生產總值高踞全國第二位，僅次於廣東，成立江蘇社團總會應該有助促進該省招商同貿易。

佢仲話江蘇社團總會轄下將有幾十個分支會，預計下個月成立。目前已搵到紡織大王方鏗、立法會前議員丁午壽等自己人加入。據聞唐唐都想搵埋富貴黨榮譽主席「田少」田北俊加入，但就唔知田少點諗。搞到咁大，唔通唐唐又有興趣東山再起？佢斬釘截鐵話，一定唔會選特首，叫大家可以放心喎。