政壇：阿王關注男人之苦
立法會財務委員會就新一份預算案連日召開特別會議，尋日輪到勞工及福利局局長張建宗去解畫，當場被工聯會議員「阿王」王國興同白鴿黨嘅「一舊雲」黃碧雲「追債」。當提到家庭暴力個案時，之前好落力並爭取到男士侍產假嘅阿王又再為男士發聲，話男性遭受家暴個案近年有上升趨勢，約達每年七百宗，佔整體數目接近兩成，可見受虐嘅唔一定係女性，男士有時都可以係弱者喎。
設計圖片及對白
倡設專用庇護所
阿王又話男士自殺率一直高，質疑政府有冇關注男士嘅弱勢處境，例如求助熱線係咪由男士接聽，又指部分受虐男士喺晚上只能流連喺二十四小時營運嘅快餐店或公園內，關注政府會唔會設立男士專用嘅庇護所等等。
聽到阿王講「男人之苦」講到咁肉緊，張建宗就話無論男性定女性受到家庭暴力佢哋都會關注，唔會因為係女性就特別關心而忽略男性，男女都會幫。至於熱線方面，佢認為冇需要指定搵男士接聽，因為接線嘅社工都係經過專業訓練，而且由女性接聽男性電話可能更加容易溝通。而部分如向晴軒等庇護所，亦無指定只接收女士，男士有需要亦可向相關機構求助。
至於一舊雲就追問張建宗有冇就侍產假再進行調查，張建宗回應話唔同地方有唔同嘅制度，唔可以一本通書讀到老，要平衡勞資雙方嘅利益，又話美國都冇前四後六產假。財委會主席張宇人聽到之後亦插嘴，話自己兩個女喺美國都要工作到生嗰吓先入醫院。講到兩個女咁辛苦，張宇人點解唔叫佢哋返嚟香港生呢？
