有時當思無時苦 港人居安需節水
「山無棱，江水為竭。冬雷陣陣，夏雨雪。天地合，乃敢與君絕。」呢首《上邪》讀過未？嗱，太一叮唔係考大家古文，亦唔係強調古人對愛情點樣堅貞，而係想話滄海桑田，源源不斷嘅江水有可能枯竭o架。試諗吓，有朝一日供港東江水都枯竭埋，點算好？
即係咁，內地水危機日甚一日，遲早都會影響到香港。國家水利部負責人前幾日話，內地正推行「節水優先」，希望香港亦參與節水，加大節約水資源嘅力度。佢亦強調，無論點慳，對港供水都唔會慳，供應量唔會減少咁話。
冇錯嘞，香港供水主要靠東江，但唔好忘記喎，東江水對東江流域嘅內地同胞同樣好重要。近年內地經濟發展蓬勃，城鎮化步伐加速，加上水污染問題失控，水已成為稀缺資源，工業缺水、農業缺水、城鎮缺水，「水危機」持續惡化。中國水資源總量話就話位居世界前列，但人均量僅為世界平均水準嘅四分之一，全球排第一百二十一位，係十三個人均水資源最貧乏國家之一，節水係當務之急。
再講喇，家陣天氣愈來愈反常，大吉利是萬一遇上大旱，東江水量不足，就算內地有心，亦未必有能力保障供港水量。如果港人唔改變習慣，只用水唔惜水，到時連個天都幫唔到o架。所以話啫，雖然東江水唔係免費，但有錢唔係大晒，更唔係畀咗錢就可以大嘥。節水優先，內地同胞有責，港人同樣有責。
之不過咁，講到節水，香港就認真羞家咯。呢，唔止普羅市民缺乏憂患意識，未養成節水良好習慣，水務署管水失職，更淪為食水「浪費大戶」。嗱，唔少水管嚴重老化，加上署方維修不力，拖拖拉拉，搞到水管爆完又爆，每年閒閒哋都有幾百宗事故，周不時上演嘅「馬路噴泉」，就係水務署嘅傑作嘞。
有數得計，香港每年將價值兩億元嘅食水倒落鹹水海，都咪話唔得人驚。尤其係，當內地缺水之際，香港喺度浪費，點都講唔通喇。所以咯喎，香港人唔好再咁大使嘞。事在人為，有人計過，如果全國用節水洗衣機，一年慳番嘅水可以注滿七百一十個北京昆明湖，呢啲就叫日子見工夫嘞。
一句到尾，居安思危，香港要解決缺水問題，必須由節水開始，由每個市民做起。旨意港產官僚做嘢，不如求個天落多幾場雨實際啲，叮！
