城中鏡：陳爽捐蜘蛛肚花膠籌款
慧妍雅集即將舉行慈善籌款晚宴，2007年國際中華小姐季軍陳爽出席記者會時透露，今年會首次以贊助商身份參加，而會長陳法蓉指佢捐咗花膠出嚟拍賣。陳爽話：「拎咗六隻家族嘅陳年蜘蛛肚出嚟。未算係家傳之寶，我哋屋企仲有好多收藏，今次係為咗做善事，希望有多啲善長人翁。價值有五位數字，再加埋好多海味禮盒，Total夾埋有六位數字。我哋屋企一路以嚟做Online零售，好期待好快就會有我哋自己嘅Showroom同Office。」
陳法蓉（右）同陳爽（左）齊為慈善晚宴出力。
提到佢早前喺社交網絡上載咗Fit爆比堅尼照片被網民大讚，佢話：「多謝，我諗係因為食得屋企啲海味多，自己希望可以做個靚嘅女仔。不過，我覺得仲爭少少，未夠Fit。」
陳法蓉碌人情卡請譚詠麟獻唱
陳法蓉就話：「今年主題係金色同紅色，今日開心到唔知係結婚定生仔咁，好熱鬧。呢個活動籌備咗好長時間，會打破好多紀錄，總共有一百三十八份禮物，總值超過一百一十萬港幣。今年係我第二次做會長，再度搞呢個活動我出咗好多人情牌。今年譚詠麟會做表演嘉賓唱歌，好多謝佢肯度期幫手，我煩咗佢好耐。」佢又話：「現時有二十一間慈善機構想我哋捐款，依家揀咗兩間先，每間都已經有七位數字嘅捐款，如果籌多啲錢就會有第三、四間。」
