城中鏡：張忠柟籲青年 從政做議員咪當官
早前香港台灣同鄉會（同鄉會）舉行新春晚會，旅港台灣幫濟濟一堂，同為台灣人嘅珠海學院校長張忠柟都有出席。佔領行動後，香港青年愈來愈激進，唔知張忠柟點樣教育學生呢？佢話當年喺美國讀書時亦參加過反戰示威，但結果美國依然故我，而政治利益就歸於政客。所以佢勸學生若想改變現實不如從政，不過係做議員唔係做官。
張忠柟（中）現身與林添茂（右）同林耀明等鄉親齊歡聚。
賴李承美（左二）幫手將晚會搞得好熱鬧，獲女兒賴明潔（右一）及女婿Francis（左一）同林華琴（右二）出席支持。
嚴重光（左）致力為學成回港嘅留台畢業生搵工。右為邱文潛。
台資企業在港覓人才
張忠柟話當年佢讀研究所時曾參加反戰，諗番轉頭覺得當時年輕人嘅熱誠被政治人物綁架，根本改變唔到政府繼續主導幾場戰爭嘅事實。所以佢話畀學生知，如果有熱誠改變社會就要從政，不過做官冇用，要走入議會殿堂至得。
到場嘅仲有台北經濟文化辦事處處長嚴重光、同鄉會前會長林添茂、林耀明、賴李承美同現任會長邱文潛等人，氣氛熱鬧。嚴重光話近年香港學生到台灣升讀大學人數屢創新高，兩年前佢哋開始舉行招聘會為學成回港嘅年輕人搵工，甚受包括台資銀行在內嘅台資企業歡迎。由於成效唔錯，今年將擴大招聘會規模。
轉頭見到香港台灣婦女協會會長林華琴都有到場，佢話六月將到台灣羅東送暖，將早前籌到嘅善款捐畀羅東聖母醫院，事關呢間醫院容許貧苦病人寫借條睇病，若三年未能還款，院方會燒毁借條。佢深被感動，決定跨海相助。
