政壇：企業紛推愚人節「限定新品」

小米雷軍下一個市場，就寄託喺男人嘅右腕之上。小米同少林寺啲大師合作研究咗智能產品「米珠」，即係佛珠版嘅小米手環。啲珠功能多多，潮玩可以用嚟影相、睇時間、計步兼檢測睡眠，傳統啲亦可以數佛珠唸經，搓下啲珠就可以充電。

百度都有「百度珠環」，仲玩埋全息投影，想訂戲飛？粒珠就將訂飛畫面射落手腕變Mon畀你撳。睇完戲想同Honey玩煮飯仔但唔識煮？百度個「神燈搜索」幫到你，你好似神燈咁捽兩捽，再問句「點煎羊架」，手機就會彈個靚仔廚師嘅立體投影出嚟教你。

Uber就推出Call周公專車服務，操作步驟同平常Call車差不多，記得最後選項要揀「呼叫周公」。專車車程三十分鐘，配有腦波振動睡眠坐墊，坐咗上坐墊，包保周公隨傳隨到。

揸揸下車肚餓點算？Audi Japan好細心，喺高級房車A8 5.5限定特仕版嘅後座中央扶手，設置一個全球獨一無二嘅電飯煲，隨時隨地歎碗熱辣辣珍珠米飯，座椅設計仲要係高級和風Style。