政壇：搞搞政：運署助理署長　過檔東華做總管

今年四十九歲嘅蘇祐安，加入政府多年，曾多次喺大塞車同車禍事件中擔任解畫工作，舊年亦有就佔領行動導致封路等問題出來交代最新交通情況，處理及臨時應變表現不錯，仕途尚算平穩。

不過，數數手指計吓條數，佢退休前最多只係可以升到副署長級別，而且工作壓力大，相比東華三院執行總監工作，應該比較「他條」，至於薪酬及福利就唔知喇。

據聞東華三院為呢個執行總監職位尋覓合適人選已有一段日子。執行總監吳志榮喺當年一九六九年一畢業就加入東華大家庭，一做就做到依家，認真長情。

遴選委員 揀足一年

話說早幾年佢其實已有意思退休，但東華一直都未搵到合適接班人，早幾年仲試過搵到合適人選後先至臨門一腳「撻Q」，令佢繼續做到依家。如今吳志榮真係可以功成身退，享受退休生活，而蘇祐安亦將於本月八日正式就任新執行總監喇。

根據院方透露，聘請執行總監一職就好似大學選校長一樣，都有個遴選委員會負責，而且並唔係一擊即中，佢哋曾喺商界等唔同公司及機構物色過唔少心水人選，前前後後花咗超過一年時間先至成事。