去到今年底，區議會委任制將成為歷史遺物，委任區議員想保住議席，就要轉戰直選。好似黃大仙區議會副主席黃錦超都力爭轉換「跑道」搵區落腳，先有望多坐一會。

黃錦超（右）積極考慮轉戰直選，旁為黃大仙區議會主席李德康（中）同區議員何漢文。（互聯網圖片）

據聞黃錦超正積極考慮參與直選，更劍指鳳凰、龍星兩大選區，與另一建制陣營嘅陳炎光同激進泛民主派譚香文鬥撼，黃錦超直言對直選有信心。

黃錦超坦言，即使佢當選都只係打算做一屆，皆因已經六十五歲，年紀唔細，加上本身要打理物流生意，所以一旦競逐連任失敗，就索性退出喎。不過，佢話始終服務該區八年，就算來屆無緣再出任區議員，都會留喺地區以另一種形式服務居民。

任職物流集團總裁嘅黃錦超本身係富貴黨成員，但前年因不滿黨選舉部署立立亂而退黨。佢喺退黨前，就加入由觀塘區議會主席陳振彬牽頭成立嘅「創建動力」，並兼任副主席，唔知呢個政團對佢轉戰直選有冇幫助呢？

第一手消息請下載on.cc東網iPhone/iPad/Android/Windows Phone Apps