政壇：創科諮詢會莫乃光無份
泛民主派議員喺立法會「拉布」，拖死咗政府力推嘅創新及科技局，由財爺鬍鬚曾出任主席嘅「創新及科技督導委員會」都要暫時「降呢」為「諮詢委員會」。創新及科技諮詢委員會成員名單尋日揭盅，除咗意料之內由行政會議新貴、特首創新及科技顧問楊偉雄出任主席外，當中嘅亮點成員係現為科技公司老闆嘅「星之子」陳易希，但搵勻成份名單，都搵唔到當日瞓身支持成立創科局嘅立法會資訊科技界議員Charles莫乃光，認真失威。
（設計圖片及對白）
政府話委員會成員主要嚟自學術界、業界同與創新及科技相關嘅團體，四月中舉行第一次會議。委員會成員名單中，有同科技有關嘅香港科技園公司董事局主席羅范椒芬同香港應用科技研究院有限公司董事局主席王明鑫、幾間大學嘅校長，包括科技大學校長陳繁昌、中大校長沈祖堯同理大校長唐偉章，仲有航拍機市場龍頭公司老闆汪滔、金山工業集團主席羅仲榮同鳳溪公立學校行政總裁馬紹良等。
疑同助長「拉布」有關
睇嚟喺科大畢業嘅陳易希，應該係最young嗰個嘞！而加入創科諮委會亦係陳易希作為其政府公職嘅「處男作」，佢坦言上星期先收到電話邀請，期望就青年創業以至買樓等問題向政府反映意見。
名單中仲有身兼行會成員嘅立法會議員葉劉淑儀同建制派陣營嘅議員EQ葛珮帆，但Charles就無緣入閘，唔知係咪同佢早前冇盡力阻止泛民主派「拉布」阻創科局成立有關呢？Charles就酸溜溜話，係咪加入委員會唔係最重要，但認為委員會成員偏重學術界同工業界，加上部分人原本已經好多公職在身，覺得委員會政治傾向比較強喎。
同樣落選兼前資訊科技界議員單仲偕更加替Charles唔抵，批評政府漠視業界意見，唔尊重資訊科技界同選民。咁嘅反應咪係吃不到嘅葡萄是酸的囉。
