膠袋全面收費 切忌眼高手低

即係咁，四月一日起膠袋徵費將會擴大到超過九成、約十萬間零售點，對市民難免造成不便，但為環保着想，就算唔方便都要支持。環保係大勢所趨，最緊要貫徹始終，唔好虎頭蛇尾，更加唔好一味做騷。呢，環境局局長黃錦星話喎，膠袋全面徵費係本港環保嘅里程碑，當局會加大宣傳，相信市民亦會養成有關習慣。

望梗係咁望喇，以前膠袋免費，依家收五毫子，的確有「里程碑」意義，至於市民會唔會養成習慣，就要睇過至知嘞。咪以為高官係咁意做幾場騷，喺商場戙幾塊廣告牌，就可以達到預期效果，要令市民自動自覺環保，宣傳同教育比做騷更重要o架。

其實，市民唔係唔支持環保，亦唔係反對膠袋全面徵費，問題係當局宣傳唔夠，好多人依家仲矇查查，根本唔知具體內容，甚至連幾時實施都一無所知；加上新措施涵蓋面太廣，豁免範圍又有唔少灰色地帶，更加令人無所適從。正如有商戶質疑，當局可唔可以講得清楚啲呢？

早排有環保組織調查發現，只有四成受訪者知道膠袋徵費涵蓋所有零售點，而反對新措施嘅市民中，多數係因為唔清楚邊種膠袋需要收費。好明顯，唔少市民對新措施一知半解，容易引起混淆及爭拗，當局絕對難辭其咎。

講開又講，環保問題千頭萬緒，膠袋徵費不過係小兒科，象徵意義大過實際意義，想減少垃圾，最有效方法就係加強回收，源頭減廢。可惜吖，港府偏偏喺呢方面做得最差。環保官僚眼高手低，源頭減廢推動多年，搞到廢物數量不跌反升，一三年棄置堆填區嘅固體廢物量，居然比一二年多咗百分之三點四，平均每人每日棄置廢物由一點三公斤增加到一點三三公斤。雖然話三堆一爐計劃已經通過啫，但垃圾不斷增加，唔好話三堆一爐，再增加幾個堆填區同焚化爐都唔夠用吖。

太一叮都係嗰句，環保係長遠之計，只有多管齊下，持之以恒，至可以事半功倍，如果一味做騷，或者三分鐘熱度，就算全面推行膠袋徵費，都係治標不治本嘅咋，叮！