街工尋日舉行三十周年晚宴，兩位香港名導演許鞍華同邱禮濤都畀面撐場，皆因街工立法會議員梁耀忠之前曾幫兩位導演做資料搜集同睇景，合作過後做埋好朋友。阿忠話，九九年許鞍華拍一套關於社會運動嘅電影時，搵過佢幫手做資料搜集，之後拍嘅多齣電影，佢都有份出力。至於邱禮濤更加用阿忠嘅故事做藍本，拍咗一套講協助無期徒刑囚犯嘅電影。照咁計，阿忠都算係半個演藝人喎！講到點解搵阿忠幫手，許鞍華話係機緣巧合，「嗰時新聞講葵青區有個後生仔死咗，我又想拍以弱勢社群為主題嘅電影，於是直接拍門搵當區區議員梁耀忠幫手，佢嗰時當我係街坊個案咁處理，好搞笑。之後介紹甘仔（甘浩望神父）我識，最後先拍得成電影。」

梁耀忠（中）獲老友許鞍華（左）同邱禮濤撐場。

除咗兩大名導演，阿忠仲打咗唔少人情牌，請到前港姐謝寧捐出六十盒蝴蝶酥義賣，認真唔話得。

第一手消息請下載on.cc東網iPhone/iPad/Android/Windows Phone Apps