政壇：搞搞政：政府fb少人讚新聞處唔爽

預算案批2600萬元搞推廣

當局近日應立法會議員要求，交代政府新聞處有冇為社交媒體覆蓋率、觸及率等訂立指標，新聞處回應話該處喺一○年五月設立YouTube頻道，同年七月開設《政府新聞網》Twitter同微博帳戶，去年十一月先開設fb專頁。

喺fb專頁開設首兩個月內，分別錄得四萬六千二百多次同十三萬一千一百多次點擊，喺二月初至三月初一個月內，總共有六千七百四十五個fb用戶讚好、回應或分享專頁貼文，相比起其他機構嘅專頁，成績非常麻麻。預算案喺一五/一六年度額外向新聞處增撥二千六百萬元，該處話當中二千萬元會用作對外推廣之用，剩低六百萬元就會喺本地電視、電台大賣廣告，繼續宣傳政府政策同措施。撥款資源多咗，成效如果唔提升，就對唔住納稅人喇。