尋日係佔領行動半周年，咁啱得咁蹺，搞佔領嘅學民思潮召集人黃之鋒就獲選財富雜誌（Fortune）全球最傑出領袖人物榜第十位。唔止咁，原來黃之鋒仲飛赴台灣高雄會合太陽花學運領袖林飛帆。政改方案下月中公布，緊接五、六月立法會又會表決政改方案，有政界中人預言呢段時間會有大型抗爭，唔通黃之鋒赴台取經，為暑假新一波佔領行動做準備？

黃之鋒（右）赴台灣與林飛帆（左）會面，莫非為新一波佔領行動做準備？

二人會面，例牌對比港、台兩場學運嘅分別，黃之鋒坦言佔領行動後，香港後生仔出現「另類思考」，開始唔相信組織活動，只信自己，同台灣好唔同。佢同時鬧爆民主黨班「阿叔、阿姨」唔了解年輕人想法，間接令佔領行動無法成功；對比台灣民進黨，民主黨已經冇影響力，支持度亦跌到得番兩成。林飛帆就話，兩地之間嘅運動經驗係相互學習，台灣係做咗先講、「先佔先贏」，相反香港係先協調、再行動，形成有趣對比，佢仲話要向香港學習添。唔通黃之鋒都打算學習台灣「先佔先贏」，以為佔領咗先就當贏？

第一手消息請下載on.cc東網iPhone/iPad/Android/Windows Phone Apps