政壇：青委會年輕代表多懶蟲
政府委任嘅青年事務委員會（青委會）成日畀人質疑委員會中部分成員年紀「超晒齡」，質疑係咪代表到青年人嘅聲音。不過，如果睇番委員出席會議嘅勤力同投入程度，青年委員就明顯差一截喇，反而有番咁上下年紀嘅委員表現更勝一籌，如警務處前處長李明逵、黃大仙區議員莫仲輝等出席率就滿分，至於青年代表如北區區議員劉國勳、曾經歷八仙嶺山火嘅張潤衡等出席率都差強人意，呢啲係咪「青不如中」呢？
設計圖片及對白
青年輩出席率約五成
尋日政府公布青委會會議嘅委員出席率，睇番二○一三至一五年嘅委員會會議，青委會成員參與會議嘅表現好參差，部分年輕委員嘅出席率雖然未至於包尾，但比起年紀大嘅委員，就明顯墮後一截。
好似「八十後」委員鄺禹韜，同成立咗培訓輔導中心嘅「衡仔」張潤衡，三年嚟平均出席率分別只得兩成半同五成，而「九十後」嘅委員蕭景威亦只有約五成八，同樣都算青年一輩嘅劉國勳出席率亦都只係得五成咋。而包尾嘅就有過去三年平均出席率近一成三嘅委員源嘉玲，而香港研究協會總幹事麥燕薇出席率亦只有近一成七。
相反，一眾有番咁上下「歷練」嘅委員出席率就「靚」好多喇。除咗時任委員會主席嘅陳振彬出席率係百分之一百外，李明逵、元朗區議員鄧廣成、莫仲輝、青年協會副總幹事馮丹薇同執業大律師范凱傑嘅出席率都係爆燈。而灣仔區議員伍婉婷出席率都有近九成二。
社會上經常都有青年人投訴政府唔聽佢哋嘅聲音，但如果有機會表達嘅時候又隱咗形，咁政府又點會聽到大家嘅意見呢？
