城中鏡：成功襲工務組 高佬賢感意外
由於泛民主派議員早前突襲，立法會工務小組委員會「淪陷」，建制派議員事後補鑊，申請加入委員會想以作制衡，但泛民處處刁難。工務小組尋日再召開特別會議，討論建制派議員逾期加入申請，本來泛民主派人數佔優嘅情況下，委員會應該會否決所有建制派議員加入，但唔少泛民未趕得切開早會，最後委員會以六票贊成、五票反對，通過批准漁農界議員「高佬賢」何俊賢逾期加入，就連高佬賢都覺得意外。
何俊賢對獲批加入工務小組都感到意外。（資料圖片）
不過，當泛民議員陸續歸位後，委員會全數否決黃定光、梁君彥及姚思榮等九位建制派議員嘅申請。連同之前獲接納加入嘅謝偉俊同張華峰，小組委員會一共接納三名建制派議員逾期加入申請，令委員會人數增至四十八人。雖然建制派仍然攞唔番委員會個控制權，但由於委員會壽命得番唔夠四個月，有建制派揚言下個立法年度會同泛民再鬥過。
