城中鏡：萬馬奔騰 同心創經典
國畫大師徐悲鴻嘅駿馬名畫，有極高嘅欣賞價值，但原來佢嘅個人作品，都可以集眾人之手，變成嶄新嘅藝術創作。大家有冇諗過，國畫大師嘅「奔馬圖」竟可變成萬呎嘅大型裝置藝術，仲會申請列入健力士世界紀錄添！
以徐悲鴻嘅「奔馬圖」為藍本，再由名人、設計師及逾萬名青年製作紙模而製成嘅大型藝術裝置正全力趕工。
徐慶平經常四出講解爸爸徐悲鴻嘅畫作。（資料圖片）
徐悲鴻夫人、徐慶平與丁子揚合作嘅設計「立體水墨」。
任達華（左）與劉小康仔細討論設計特點及選用邊種物料。
裝置藝術展氣勢
唔係癡人說夢話！呢個由香港青年協會賽馬會慈善基金主辦、徐悲鴻藝術委員會協辦嘅「萬馬奔騰．萬眾一心」裝置藝術及教育計劃，整項大型裝置藝術係以徐悲鴻筆下嘅「奔馬圖」為藍本，包括徐悲鴻夫人及兒子徐慶平在內，仲獲得十八名演藝名人同本地設計師協助合力創作嘅，再與一萬隻由青年創作嘅紙模，一齊馳騁於高低起伏嘅山巒，展現萬馬奔騰嘅氣勢，同時亦寓意各界攜手，萬眾一心完成創舉。
參與創作嘅名人同設計師可謂費盡心思o架，好似徐悲鴻夫人及兒子徐慶平就同年輕設計師丁子揚合作，佢哋嘅設計凸顯大師下筆時水墨同畫紙相觸散發嘅一瞬間，幻化成「立體水墨」；一向點子多多嘅吳君如同陳幼堅嘅作品，靈感就係嚟自公眾熟悉嘅成語「指鹿為馬」；任達華同劉小康首次合作，以透明物料拼貼喺「悲鴻奔馬」身上，凸顯馬匹身軀嘅立體感同光線折射效果。同樣首次合作嘅李嘉欣同余奉祖，作品以「星火相傳」為主題，取材自人馬星座，呈現跳躍同節奏美感。
當然仲有其他名人嘅創作，依家講唔晒，但係市民可以喺四月三日至五日去到沙田馬場參觀呢個大型展覽，到時仲會展出十幅國畫大師嘅作品，睇吓呢幅寓藝術於教育嘅萬呎大型藝術裝置嘅氣勢。
