中產中嘅中產鬍鬚曾，除咗花劍了得之外，狼來了花招亦係出神入化。你睇佢，重複又重複咁刻意估錯數，畀市民鬧到九彩又安之若素，就憑呢兩點就勝任做財爺啦，至於點樣推動經濟、改善民生？唓，實務嘅嘢，唔通高官自己做咩，你話係咪？

不過呢個社會就係有人唔識諗，好似90後樑仔咁，係都要當面問吓鬍鬚曾點幫青年向上流，咪日日去Coffee Shop打躉，希望活捉野生鬚哥囉。天遂人願，樑仔偶遇鬍鬚曾，即刻捉住佢嚟問：「鬚哥，我哋後生仔點先掘到第一桶金呢？」

鬍鬚曾見呢條口靚仔咁有誠意，都唔吝嗇過兩招畀佢：「口靚仔，香港地大把機會，你有冇抽紀念鈔吖？全家總動員，抽中好過等政府救經濟啦。」可惜嘅係樑仔已錯失登記時機，失望心情堆晒上面，鬍鬚曾輕拍樑仔鼓勵道：「唔緊要，錯失機會就要多啲增廣見聞、留意時事，充實自己。你睇，報紙話人糞裏面都有黃金，你努力去掘，遲早發達嘅。」

第一手消息請下載on.cc東網iPhone/iPad/Android/Windows Phone Apps