政壇：才女蔡紅軍強勢加盟花旗
投行入面，一線女將有幾多位，真係數得出。美銀美林資深銀行家蔡紅軍最近畀花旗挖角，將出任花旗中國區主席及中國投資銀行業務主管，能夠喺男性主導嘅投行界當中跑出，實力夠唔使講，仲收到風話蔡紅軍以前原來係北大校花兼才女。
蔡紅軍係早年少數去華爾街闖嘅女性。（互聯網圖片）
蔡紅軍喺美銀美林做咗超過十七年，負責國企同民企上市融資併購，係間行嘅中國區業務舵手，舊年就有份領導中石化分拆下游一百七十五億美元嘅零售項目。
佢畢業於北大國政系，喺北大時又體操隊、又劇社、又攝影隊，完全係風頭躉一名。佢仲係早年少數去華爾街闖嘅女性，由底層分析師做到投行中國部一姐，絕對係實力派。
講起華爾街，醒起號稱華爾街最有權勢嘅女人─大摩（摩根士丹利）財務總監波拉特（Ruth Porat），剛亦宣布五月底跳槽去Google做大掌櫃。
