政壇：星星變錄音機擋質詢

克勤仔尋日提出口頭質詢，要求環境局交代近年推行多項減廢措施後，垃圾棄置量仍然持續上升嘅原因。佢又話，《香港資源循環藍圖2013-2022》指出，近年回收率下跌嘅主要原因，係因為廢膠出口數據出現大幅度波動，要求當局交代原因，係咪因為內地當局實施「綠籬行動」。

雖然克勤仔提出嘅問題非常明顯，但星星淨係識不斷推銷擴大膠袋徵費。佢話本港都市固體廢物嘅人均每日棄置量，由一一年嘅一點二七公斤，上升至一三年嘅一點三三公斤，而回收率就由一一年嘅百分之四十八，下跌至一三年嘅百分之三十七。

稱按藍圖推動回收業

至於回收率下跌係咪同「綠籬行動」有關，星星話廢紙同廢膠回收量因為受到外圍環境影響而減少，但近年市民使用膠袋數量卻有上升趨勢，認為當局推行擴大膠袋徵費，有助減低膠袋使用量，呼籲市民支持徵費。

佢跟住又話當局會繼續按照資源循環藍圖推動回收工作，呼籲財務委員會盡快通過十億回收基金撥款申請，令回收業可持續發展。

星星又透露當局今年內將與業界組成乾淨回收小組，推動相關回收工作。雖然佢講足十五分鐘，都無直接回應到克勤仔嘅問題，但足見佢已經明白官場生存之道，就係做一部人肉錄音機，點都係答非所問。