流感殺人賽沙士 官僚病毒冇藥醫
一早有人預言變種流感殺人勁過沙士，死亡數字可能超過四百人，果然不幸而言中。究其原因，除咗病毒變種降低疫苗保護力，更加因為港產官僚防疫大歎慢板，應對失措，有咩法子唔死得人多吖。
官僚不殺伯仁，伯仁因官而死。正如有傳染病專家話齋，雖然流感病毒出現變種，但襲擊對象同以往一樣，主要係七十歲以上長者以及患高血壓等長期病患者。再講吖，變種流感同樣肆虐台灣，但當地只有十幾宗死亡個案，反映港府防疫措施水皮咁話。冇錯喇，唔怕唔識貨，最怕貨比貨，如果唔係港產官僚食塞米，樣樣嘢都差過人，又點會由沙士、豬流感、禽流感到家陣變種流感，幾乎次次都係香港爆得最勁呢。
係人都知，對付流感最有效嘅係疫苗，弊在香港自己冇生產，結果要四圍班救兵，十萬劑疫苗最快下個月先至到貨，怕只怕到時流感高峰期已過，隨時重演當年豬流感疫苗過期，要送去堆填區嘅一幕。難為港府成日話要發展高科技，醫療產業更加係六大優勢產業之一，到頭來連疫苗都無法生產，簡直笑大人個口。
唔講疫苗猶自可，一講把幾火。原來本港疫苗接種率十年如一日，仲係停留喺一成至一成半，遠低於其他發達地區，即使醫護人員亦只得三成接種率咁大把，連食物及衞生局局長高永文都承認情況好唔理想。你話嘞，一旦爆大鑊，前線醫護人員都自身難保，仲點保護市民？
都係專家講得啱，之所以出現「疫苗成效低、預防意識低同接種率低」嘅三低情況，搞到流感殺人如麻，衞生官僚失職難辭其咎。早前有調查發現好多家長誤以為流感疫苗會降低兒童免疫力，查實出現嚴重副作用嘅機率只有百萬分之一。如果唔係官方宣傳不力，家長又點會對疫苗功效一知半解，接種率又點會咁低吖。
正所謂，吃一塹，長一智。有人建議當局派員上門為社區高危人士接種疫苗，醫管局亦可以喺轄下門診免費幫病人接種，並將接種率訂為機構嘅績效指標。建議係好嘅，問題係港府肯唔肯從善如流啫。
不過嘥氣啦，港產官僚向來奉行「少做少錯，唔做唔錯」嘅管治哲學，呢種官僚病毒無藥可醫，又冇疫苗可防，兇猛過變種流感多多聲。靠官不如靠己，家陣流感高峰期仲未過，市民都係小心啲好，叮！
