城中鏡：惜食堂「另起爐灶」
專門回收食物、製作飯餐派畀有需要市民嘅慈善機構惜食堂，位於港島區嘅中央廚房因租金高企而要另覓新址，好彩上海總會做善心人，一口氣用一千四百萬元買咗柴灣一層四千幾呎工廈，以極平租金提供惜食堂做中央廚房，尋日特意舉行盛大開幕禮，場面好熱鬧。
王緒亮（右四）同梁錦松（右三）出錢出力幫董愛麗（右一）延續送暖行動。
寬敞明亮嘅中央廚房一角。
何宗慈（前）幫手將暖笠笠嘅飯餸裝入飯盒。
加碼贊助裝修費
惜食堂主席梁錦松、上海總會理事長王緒亮同惜食堂創辦人董愛麗等人都有出席，仲有資助該廚房營運經費嘅利希慎基金總裁何宗慈等人。現場仲有幾位受惠嘅長者，佢哋閒時都會喺廚房幫手做義工，實行幫人亦幫己。
睇住董愛麗長大嘅王緒亮話，初初佢以為惜食堂係製作飯盒向基層出售，後來至知係免費派發，即刻覺得呢個做法好值得支持，所以向上海總會理事會提出購置工廈供惜食堂做中央廚房，以免佢哋寄人籬下，經常要搬遷，結果好快就得到支持，大家仲決定加碼贊助埋裝修費添！
梁錦松亦話，多得上海總會幫手先有個咁大嘅廚房。佢話四年前惜食堂只有港島區中央廚房，每日提供二百盒飯，前年喺深水埗增設第二個廚房後，兩個廚房每日共可提供六千盒飯，數量增長既反映社會確有需求，亦多得社會善心人士嘅捐助，先至可以將件善事愈做愈大。話時話，上海總會嘅菜式非常出名，唔知日後有無機會派出大廚，幫手製作有上海風味嘅飯餐畀街坊歎吓呢？
