行政會議最近拍板通過機場第三跑道嘅擴建工程，最新造價估算高達一千四百一十五億元。呢個本港最貴嘅單一基建項目，運房局局長張炳良解釋機管局只會透過借貸承擔三分一工程費，另外三分二將會透過停止向政府派息同埋向旅客徵收一百八十元嘅建設費，以及增加航空公司收費籌措。外界預料航空公司嘅收費增加，最終亦轉嫁乘客，乘客變相雙重付費，更有立會議員質疑徵費水平太高，搞到市民怨聲載道。而據政府「往績」，三跑隨時變成大白象工程，到時出現超支，事隔咁多年，真係要搵人算帳都難啦。
