立法會議員個人利益監察委員會(CMI)主席尋日代表CMI喺大會提決議案,建議修改《議事規則》第八十三條有關議員披露金錢利益嘅規定,容許議員喺討論立法建議時,只需喺第一次會議發言申報利益,容許議員毋須披露屬市民共同享有嘅金錢利益。

其實CMI事前已用問卷諮詢全體議員意見,工黨同公文袋大部分議員表明同意有關修改,但喺尋日大會上,外號「正盲毛」嘅公文袋毛孟靜同工黨何秀蘭,居然喺最後關頭突然扮失憶反對決議案,話放寬利益申報程序會影響市民對立會嘅觀感,反批評委員會事先冇諮詢過佢哋嘅意見,淨係邀請各黨代表討論咗就算,認為立會唔應該喺未得到大部分議員支持前,倉卒推行有關建議。

卿姐炮轟冇誠信

對於有泛民中人突然今日的我打倒昨日的我,白鴿黨主席「卿姐」劉慧卿無因為大家係同路人而唔出聲,反而大義滅親,而且炮聲隆隆,佢話議員雖然有言論自由,但覺得做人最重要係頂天立地,有誠信,唔好喺諮詢時明明贊成建議,但發言時就反對,批評佢哋嘅做法唔尊重委員會之餘,仲要嘥立會開會時間。

建制派嘅保險界議員陳健波其後發言時,大讚卿姐嘅言論發人深省,話議會需要做實事嘅議員,而唔係見到有位入,就瘋狂抽水、曲解《議事規則》嘅議員。佢認為議員唔應該為選票埋沒良心,大嘆一日有呢班人喺立法會,香港依然唔可以進行成熟嘅選舉。

CMI主席話聽到泛民歪理連篇,曾經諗過撤回決議案,但因為佢係代表委員會提出所以打消念頭,決議案最後以三十一票贊成、二十票反對,無法喺地區直選取得過半數支持而被否決。唔知正盲毛同何秀蘭畀泛民中人同建制派省到立立令之後,下次會否保證唔會重複犯下同一錯誤呢?

第一手消息請下載on.cc東網iPhone/iPad/Android/Windows Phone Apps