政壇：咪兜自動升降議員免辛勞

話說立法會秘書處喺幾個月前引入可以用遙控控制升降嘅咪兜，方便議員唔使落手落腳校高校低咁辛苦，但工黨嘅何秀蘭之前為被廉政公署請飲咖啡一事解畫時，就因為電線鬆脫而校唔到個咪兜，要攞本書嚟墊高「扑咪」，認真樣衰。

蘇錦樑尋日喺立法會試用自動升降嘅咪兜。

因應另一議員「卿姐」劉慧卿要求，秘書處最近就索性使咗成兩萬蚊整個自動升降咪兜，議員可以自己撳掣調高或調低咪兜，唔使再勞煩秘書處職員代勞。卿姐尋日仲教埋商務及經濟發展局局長蘇錦樑點用個咪兜，對方大讚秘書處夠細心，對議員訴求有求必應咁話。