立法會會計界議員梁繼昌尋日喺立會發言時，自爆有議員提議秘書處喺立法會大樓內增設自動櫃員機（ATM）服務，等佢哋足不出戶都可以撳錢。秘書處曾接觸過幾間銀行，但間間都耍手擰頭，因為立會職員太少，擔心無乜生意做。

梁繼昌爆有議員要求立法會增設自動櫃員機。

查實距離立會最近嘅ATM只係得五分鐘路程，隔籬嘅政府總部內亦設有ATM，但一眾議員仍然覺得唔方便。梁繼昌話，佢曾喺立會外搭的士，但發現帶唔夠錢，要向他人「籌錢」先得，所以若立會有ATM都幾方便喎。

不過，如果立法會真係引入ATM，都要小心處理由邊間銀行提供服務，唔係就隨時引起政治口水。例如引入中國銀行ATM，分分鐘令身兼中銀（香港）信託董事長嘅金融界議員吳亮星好唔得閒。如果引入滙豐銀行ATM，唔知會唔會招人話柄，批評立會引入外國勢力呢？

第一手消息請下載on.cc東網iPhone/iPad/Android/Windows Phone Apps