相信大家仲記得，行政會議成員兼立法會議員葉劉淑儀年初二喺車公廟畀神獸麒麟撞飛，仲幾乎跌落地嘅場面，成為咗坊間熱話，估唔到喺呢一「撞」之後，佢嘅民望亦都急跌，真係唔好運。香港大學民意研究計劃就市民對行政會議成員嘅排名同評分進行民意調查，發現葉劉嘅評分跌至四十六點三分嘅不合格水平，仲係佢出任行會成員以來嘅新低。之不過，另一位行會成員鄭耀棠，喺今次民調中嘅排名直情跌出「五大」。呢啲就叫做低處未算低嘞！

話時話，鄭耀棠喺上一次同類調查中嘅評分已經跌至二○○三年七月以來新低，而根據民研計劃喺今個月初進行嘅民調，結果顯示鄭耀棠嘅民望插水式下跌，由上次排名第四位，下降至跌出五大。由於有關調查中獲得提名最多嘅六位行會成員先可以進入第二輪嘅評分階段，因為鄭耀棠嘅認知率不足，今次就不獲評分。咁又係嘅，既然冇人識得佢，又點評分呢？

僅林煥光高於50分合格

相反，民調結果顯示葉劉係最多被訪者提及嘅行會成員，認知率高達九成六。不過，多人識唔代表啲人就覺得你好，葉劉嘅評分同排名唔止冇跟住認知度提升，仲反而跌咗，由舊年九月嘅四十九點一分跌至今次嘅四十六點三分，係佢出任行會成員以嚟嘅新低，而佢嘅排名亦都由第二位跌至第三位。而同葉劉一樣評分跌至上任新低嘅行會成員仲有羅范椒芬，佢嘅評分下跌咗二點二分至四十一點八分，排名亦跌咗兩級至第五位。

其實，即使係位於排首五位嘅行會成員，當中亦只有行會召集人林煥光嘅評分係高於五十分合格水平，睇嚟行會成員嘅表現真係強差人意，應該自我檢討下喇！

第一手消息請下載on.cc東網iPhone/iPad/Android/Windows Phone Apps