牛鬼蛇神未落鑊 亂象點會有盡頭
多年前有套港產片叫《等候董建華發落》，今時今日亦有一套荒謬劇上演，叫《等候律政司發落》。呢套戲犀利咯，映期特別長，律政司一味歎慢板，都唔知幾時至落畫。
唔係亂噏o架，佔領鬧劇已結束三個幾月，警方兌現承諾完成調查，並先後展開三波拘捕行動，總共拘捕四十八人，可謂勞心勞力，任勞任怨。一哥曾偉雄係咁講嘅，被捕人士涉及參與及組織非法集結，當中包括扮演主導角色嘅搞手，調查報告已交律政司，正等候律政司進一步指示。
即係話，個波已經交到律政司手上，只要一聲令下，就可以即刻展開檢控。可惜吖，你急佢唔急，律政司放軟手腳歎慢板，拖到家陣都未有下文。係人都知，佔領行動霸佔道路，破壞法治及社會秩序，影響經濟及民生，係徹頭徹尾嘅違法行為，連佔領搞手都唔敢否認。人證物證俱在，偏偏律政司遲遲唔採取檢控行動，如果話唔係投鼠忌器、欺善怕惡，真係冇人信囉。
有立法會議員擔心，佔領會如過往類似案件，拖幾年都無下文。咁又係呀，好似貪曾同貪湯案咁吖，咪又係查足幾年都冇聲冇氣。尤其係佔領幕後黑手、壹淫媒老闆淫賤黎同外國勢力有千絲萬縷嘅關係，當局係咪因為咁而有所顧忌呢？畫公仔唔使畫出腸嘞啩。
呢，就係因為當局有法不依，香港先至會七國咁亂，尤其係最近頻頻上演反水客鬧劇，更加搞到永無寧日。大家有眼見，佔領雖然告一段落，但鳩嗚、驅蝗、光復輪番上演，根本就係變相佔領，激進組織仲乘機散播港獨歪理，令香港亂上加亂。有人話，佔領好似癌細胞咁極速蔓延，令香港流血不止，真係冇講錯o架。連內地官媒亦嘲笑香港，指香港自詡法治之區，竟然任由反水貨客示威者恐嚇、攻擊內地旅客，肆意摧毀旅遊業，奢談法治顯得可笑。香港淪落到咁嘅地步，你話係咪羞家吖？
講到尾，香港之所以烏煙瘴氣，皆因當局無能，遲遲唔將嗰班牛鬼蛇神落鑊。當局有法不依，等於話畀其他人知，犯法唔需要付出代價，再咁落去，香港法治不存，只會變成無法無天嘅罪惡城。咪話太一叮唔提醒，斬草不除根，春風吹又生。政改方案將於年中表決，當局仲唔盡快採取行動，將牛鬼蛇神繩之以法，大規模騷亂必定再次爆發，到時香港想唔死都幾難，叮！
