城中鏡：趙樓神識做 女粉絲冧晒
長實執行董事趙國雄推盤時創意多多，係鏡頭焦點所在，尋日佢喺一家酒店主持旗下新盤嘅記者會時，竟然有位喺酒店飲下午茶嘅女士忽然撲出，同記者爭位影相。醒目公關立即上前查問呢位女士嘅來歴，原來佢係「趙樓神」嘅粉絲，表明身份後，佢更即刻走埋「趙樓神」身邊，主動索取樓神卡片，仲笑問憑「片」買樓有冇折扣喎，跟住仲要一齊自拍，趙樓神期間有求必應，真係順得人。
女粉絲昨日突襲趙樓神，但樓神表現淡定。
不過，呢位粉絲跟住都呻，話早前買咗長實旗下荃灣環宇海灣嘅單位，但依家仲未收到收樓通知書，樓神即刻解決問題，搵嚟公關大員同嗰位女粉絲抄低晒資料，仲表明會跟進協助，咁都未算，趙樓神最終仲幫呢位粉絲同佢嘅朋友下午茶「埋單」，嘩，咁識氹人，唔怪之得佢大把粉絲啦。
