政壇：搞搞政：樹根帶世姪女助理落區
立法會議員鍾樹根早幾年先由東區區議員「升呢」進身立法會議員，但近年已經憑特別嘅中英文運用技巧紅爆政壇，知名度大增。我哋最近發現樹根落區時身邊多咗個靚女助理，更踩入屬於工聯會地頭嘅小西灣邨，向街坊大派生肖吉祥物。不過，樹根話會將呢位靚助理「收歸己用」，未有計劃派佢參加年底區議會選舉喎！
鍾樹根請咗個世姪女Elaine（右）做助理，但並非為年底區選做準備。
鍾太（右）突然帶同紅菜頭湯現身，樹根笑住咕咕聲係咁飲。
樹根向我哋介紹呢位靚女助理植潔鈴（Elaine），Elaine除咗係大學英文系畢業嘅八十後，更加係小西灣邨街坊，樹根可謂由細睇住世姪女大，早前再經街坊介紹出任樹根助理。樹根所屬嘅民建聯，陸續有地區元老級交棒畀地第二、三梯隊，咁樹根係咪想Elaine接棒先？點知樹根話Elaine仲好後生，未有計劃參選，莫非要等下屆有位先可以出選？
就喺呢個時候，鍾太突然帶同紅菜頭湯現身，笑笑口咁叫樹根飲湯，樹根亦好受落，笑住咕咕聲係咁飲。鍾太隨時隨地帶埋湯嚟「辣」更，相信所有助理已經比鍾太過目兼首肯喇！
