機場第三條跑道(三跑)落實興建,但融資方案就畀外界鬧爆,估唔到呢個議題喺民主黨(白鴿黨)都引發內部爭議,立法會議員單仲偕(單雞)跳出嚟歡迎,更建議政府發行「微債券」,等市民齊齊做股東。唔夠一日,該黨「乳鴿」南區區議員柴文瀚卻突然發新聞稿,話已經發起黨內聯署反對興建三跑,唔通明寸老鴿?睇嚟一場老鴿嫩鴿嘅內訌又嚟喇。

設計圖片及對白

政府呢項史上最貴嘅基建雖然得到白鴿黨嘅老鴿支持,但明顯白鴿黨都有一眾乳鴿唔收貨,該黨交通事務副發言人柴文瀚尋日宣布發起黨內聯署,批評行會草率通過興建三跑建議,又話對現行計劃有保留。柴文瀚批評,行會喺未解決空域同法律問題嘅情況下倉卒通過興建三跑,令人難以信服,質疑當中有不可告人嘅秘密。份聲明只係批評政府目前嘅計劃不符該黨要求,但仔細一諗,就會發現其實佢都有不點名批評支持計劃嘅單雞同亦表態支持計劃嘅胡志偉。

對於乳鴿利用黨內聯署「逼宮」,單雞將呢件事歸咎於外界想以此凸顯該黨內矛盾,又話自己一啲都唔介意,但就拒絕再回應事件。其實,該黨立法會議員何俊仁(AV仁)係機管局委員,事前一定有喺機管局會議內討論過呢個三跑融資方案,家吓黨內有異見,班乳鴿係咪應該要求AV仁解釋吓呢?

第一手消息請下載on.cc東網iPhone/iPad/Android/Windows Phone Apps