政壇：議員提早收工各自精彩

高佬賢話對新安排好支持，直言議員只坐喺立法會係難以聽取選民意見，亦不利選民認識自己，所以尋晚休會後佢就出席上水菜社活動，同一班菜農會面。佢又話，農民舉行活動要擇日，唔會遷就議員開會時間，若夜晚十點先收工，就會錯失同農民見面嘅機會喇。

議員王國興尋日就少有地西裝骨骨現身立法會，原來佢夜晚要出席香港書法協會活動，佢嘅師傅、書法家余寄撫都會出席，唔怪得要隆重其事啦！至於休會後冇公務活動嘅紡織及製衣界議員鍾國斌就話，難得周三可以早啲收工，會返屋企同太太「撐枱腳」，仲話最愛嘅家常菜係肉餅，有肉餅嘅話，飯都食多啲喎。